Muhammad Ali

Dr Muhammad Ali (* 17. Januar 1942 z Louisville, Kentucky as Cassius Marcellus Clay Jr.; † 3. Juni 2016 z Scottsdale, Arizona) isch en amerikanische Boxer gsi. Er het as dr äinzig dr Ditel Unumstrittene Boxwältmäister dreimol in sinere Karriere chönne gwünne. Er het zu de bedütendste Schwergwichtsboxer und bekanntiste Athlete vom 20. Joorhundert ghöört und isch 1999 vom Internazionale Olympische Komitee zum «Sportler vom Joorhundert» gweelt worde.^[1]

Au usserhalb vom Boxring het dr Ali für Schlagziile gsorgt. So het er öffentlig dr Vietnamchrieg abgleent und het dr Milidäärdienst verwäigeret. In de 1960er Joor het d Emanzipazioonbeweegig vo de Afroamerikaner understützt. Dr Kampf Rumble in the Jungle gegen e George Foreman und d Kämpf Fight of the Century und Thrilla in Manila gegen e Joe Frazier gälte as Klassiker under de Schwergwichtskämpf.